مصطفى بسيط بعد الهجوم على بيومي فؤاد: "كل كلمة هنتحاسب عليها"

علق الفنان مصطفى بسيط على الهجوم الذي واجهه الفنان بيومي فؤاد، بعدما تحدث عن الفنان محمد سلام وموقفه من الاعتذار عن مسرحية زواج اصطناعي بسبب أحداث غزة.
كتب مصطفى بسيط على صفحته على انستجرام: “الفتنة خلاص كل الناس شيرت اللي مع واللي ضد، وكله كتب بوستات وشير واتبسط، خلاص خلصنا مزايدات على بعض وخونا وكدبنا بعض، افهم إنك بتشارك في تقطيع بني آدمين زيك زيهم، وكلهم بيدافعوا عن نفس القضية”.
تعليق مصطفى بسيط على موقف بيومي فؤاد
وأضاف مصطفى بسيط: “كل ده عشان ايه التريند والسوشيال ميديا اللي بقت بتحركنا كلنا، لدرجة إننا بنشير اللي لينا فيه واللي ملناش برضو، وقررنا فجأة أننا نستبيح الناس وأعراضها عشان اللقطة أو الريتش، وبقى كل حد من حقه أنه ينتقد ويشتم في الناس طالما مفيش حد هيحاسبه”.

وتابع مصطفى حديثه: “بس خليك فاكر إن مفيش حد هيحاسبك على كلامك وفتنتك دي في السوشيال ميديا، لكن لما يتوفانا الله ويوم الحق، وأعرف كويس أن أى بوست أو هجوم على شخص أنت متعرفش عنه حاجه ربنا هيجيبله حقه منك ومن غيرك ربنا العدل لأنه قال: ما يلفظ من قول إلا لديه رقيب عتيد.. خليك فاهم إن كل كلمة هتطلع منك بتتكتب وهتتحاسب عليها”.
واختتم مصطفى بسيط حديثه: “أنا مش بدافع عن حد، أنا لا مع ولا ضد لأن مش لازم كل حاجة يكون ليا فيها رأي.. ربنا يهدينا جميعًا ويصبر أهالينا في فلسطين”.